Sejarah

Sejarah Singkat HKBP Aek Kanopan
HKBP Aek Kanopan Andorang So Ojak Gabe Huria

  1. Parmingguon marganti-ganti do ingananna sipata:
  2. Di jabu
  3. Di parsingkolaan
  4. Gerbong ni kareta api
  5. Parhobas tu ulaon minggu pe, tong do margantip-ganti ise ma na sompat mangulahon.
  6. Dung berselang piga taon, di tuhor ma pargarejaan di Kampung Toba ± 1,5 rante dipanjongjong ma gareja disi 8 x 12 m. Keadaan gereja ima darurat. Letak ni tano ima :
  • Timur : parjabuan ni halak hita
  • Barat : parjabuan ni halak dison
  • Selatan : parjabuan ni La Dueng
  • Utara : parjabuan ni Sam Kau
  1. Parmasuhon ni parmingguon ma mereng tu tingkina do :
  • Sipata, jam 1200
  • Sipata, jam 1300
  • Sipata, satonga 100

Ala tingki i, ari minggu do panjalahan ni ngolu, sebahagian, halak hita, ala ari minggu do gajian kobun.

  1. HKBP Aek Kanopan Ojak Gabe Huria

Taon 1955 ojak ma HKBP Aek Kanopan gabe huria, na marressort tu Kisaran. Dung taon 1956, gabe ressort ma Rantau Parapat gabe masuk tu Rantau Prapat ma HKBP Aek Kanopan marresort, ala Aek Kanopan masuk tu Kab. Labuhan Batu. Ima na ni uluhon ni amanta Pdt. M. Hutauruk. Ala naung di bereng pandita ressort keadaan ni HKBP Aek Kanopan, hurang bertanggungjawab, tu na mangulahon minggu dohot parhepengon; gabe dipasu-pasu ma hami gabe sintua : tanggal : 20 – 9 -1959.

  1. A. P. Hasibuan (+) / br. Hutahaean
  2. M. Lubis / br. Simajuntak
  3. M. D. Simatupang (+) / br.Silalahi (+)

Tu ari na mangihut, gabe dibahen amanta Pdt. M. Hutauruk ma pamilliton wakil Guru Huria : Tangggal, 15 April 1960, gabe St. M. Lubis ma monang, ima gabe Wakil Guru Huria.

  1. Perbaikan Tu Parmasuhon ni Parmingguan

Taon 1960, mangkatai ma angka na tua tua, dohot angka sintua, dohot ruas asa ditontuhon parmasuk ni minggu. Gabe satahi ma nasida masuk jam 11. Manang piga pe na ro mandohoti, pungkaon do tong parmingguon. Ruas ni huria tingki i 29 Rumah Tangga. Anggo antara 1 taon, 2 taon, tung lungun do parmingguon i. Ai ise na leak boi ro ima.

Taon 1962, pinda ma amanta Pdt. M. Hutauruk jala na mangganti ima Pdt. A.H. Sitorus. Pinda amanta Pdt. A.H. Sitorus, na mangganti ima Pdt. W. K. Tampubolon. Jala namanggaonti Pdt. W.K Tampubolon ima Pdt. P.K. Sinaga. Dung amanta Pdt. P.K. Sinaga na manguluhon huria on, tongtong do diharingkothon nasida ulaon, asal ma saut sangkap laho pahembangkon Huria i. Disada tingki berusaha do angka pengurus laho mangidohon pargerejaan i:

  • tu Camat,
  • tu Adm. Perkebunan M. Muda,
  • tu Urusan Agraria Jalan Suka Mulia Medan
  • tu Kantor Gubernur. Gubernur Talambenua.

Gubernur ma mambahen memo tu Adm. Muda, alai ndang adong hasilna, ala so berhasil pangidoan i, tubu ma sangkap di hami angka pengurus laho manggarap tano perkebunan, bahen pargerejaan, ima inganan ni pajak saonari. Tgl 24 September 1965 laho do iba tu Rantau Prapat tu ressor laho paboahon, sangkapon asa diboto nasida namasa: Tgl 29 September 1965 di tingtinghonma. Marsogot ari, Senin 30 September 1965, hita ruas ni huria on, asa masiboan kampak na be dohot parang, alat tebang ima laho manggarap pargarejaan, jalan ter Rumah Sakit. Hadir hita pukul 700, tutu saut ulaon i dipatupa. Hera 2 jam nunga songon na tiur, ala antar na ummetmet do parjolo di tobang. Di tingki na masa i, ro do sian pihak polisi amanta: B. Silalahi ( Wakil Kapolsek dohot anggotana). Ro do asisten Afdeling I. D. Manurung. Dibahen polisi do tembakan /letusan. Alai ro ina mandok : “Ai  songon do hape soara ni pestol amang, ulahi hamu jolo asa tangkas hubege hami: gabe beringis nasida.”

Asisten D. Manurung mangido asa disitampas jolo asa melapor tu Adm, alus ni ima: dokkon hamu ro Adm i tuson asa hualusi hami. Ai hamu pe haduan dohot do marminggu tusi, laos laho nasida manadingkon hami huhut mandele. Domu tusi gabe di ajak polisi ma hami tu tangsi na di lambung Kotaan. Holan ama do na di ajak sebagai tahanan songon barang bukti di nasida. Hira- hira pukul 11 siang do hami di boan tu tangsi, jala torop nami 19 halak, hira hira sajom ro ma angka inanta maroban kopi, gabe tu los ni tangsi i ma hami minum. Dung sajom nari  ro ma indahan ro ma indahan-ikan daging B1 dohot  tuak. Gabe songon na gusar ma keluarga ni polisi ala sipanganon. Namamboan sipanganon amanta S. Sibarabi/ br. Marpaung. Alai ruas ni Metodis do nasida. Jam 11 na lam dipalua ma hami sian tangsi dung ro parenta sian Rantau Prapat sian Kapoltres Labuhan Batu, ai nunga binahen hian hubungan. Mauliate ma di Tuhanta raja ni huria i, ala dipatulus sangkapi. Ima bagas joro ni Tuhanta on.
“Marungkil laho manabur Marolop-olop manggotil”
 
Catatan: Di Rantau Prapat do tingki. Jala parbinoto do nasida dison.

  1. Kapolres : Amanta F. Pasaribu
  2. Kejaksaan : Amanta J. Damanik
  3. Wakil Kodim : amanta Hutajulu

Dung amanta Pdt. P.K Sinaga gabe pandita tu Aek Kanopan taon 1965. Aktif do dohot nasida mangarahon pemindahan ni gareja. Jala dung pinda pargarejaan sian Kampung Toba tu tano garapan, na pinatorang di ginjang i, sering do nasida ro tu Aek Kanopan, mambahen pandanngan dohot  Evangelisasi. Mardomu mai tu pangidoan asa gabe Ressort HKBP Aek Kanopan on. Tung diharingkothon nasida ulaon  sahat tu na disi pucuk pimpinan, laos mardomu amanta Praeses: Pdt. J. Togatorop, diharingkothon nasida do ro sian Pematangsiantar ala do praeses tingki i. Pendek hata,  terlaksana ma gabe Ressort Aek Kanopan, na manjae sian Rantau Prapat, na pinajae ni Pdt. P. K. Sinaga.

Gerakan Pembangunan

Dung ditolopi HKBP Aek Kanopan gabe Ressort, manghatai ma angka natua-tua taringot lanjutan ni bangunan. Dung Ressort HKBP Aek Kanopan, na parjolo Pdt. T. Manurung ma na managuluhon, Alai  berselang 3 bulan ro ma Pdt. T.O. Purba gabe pandita di ressort on jala pinda ma Pdt. T. Manurung. Pdt. T.O Purba ro tu ressort on, lajang do pe ( dang marhasohotan) alai dung 2 taon mar rumah tangga ma nasida di Tampahan Balige, pinaborhat ni huria on. Pdt. T. Manurung, Pdt. T.O.Purba : Kost dijabu nami, ala lajang dope nasida hatihai. Dung sinangkapan pinda gareja sian pajak sinuaeng on, di bongkar ma gareja  tu inganan on alai tong dope darurat. Diuduti ma muse tu gerakan pembangunan semi permanen. Disangkapi ma muse mambahen pesta bangunan jala terlaksanana doi jala denggan do hasilna. Tingki pesta  pembangunan i, di undang panitia do pemerintah. Jala ro do Bupati : Ihwan Maksum sian Rantau Prapat. Denggan do didopi  nasida pesta i jala adong do sampe saonari foto keadaan ni pesta i. Jala amanta Pdt Purba dohot Pdt.T.O. Purba do pandita di tingki i pesta bangunan i.

Pesta Peletakan Batu Ojahan ( MBO)
Disangkapi panitia ma mambahen batu ojahan. Saut do i dipatupa, na ni uluhon pucuk pimpinan HKBP, ima amanta Ds. T.S. Sihombing jala pandita tingki i ima amanta Pdt. N. Simanjuntak. Rame do pesta i ai mangkuling do ogung  sabangunan. Tupa do silua jala denggan do mardalan do pesta i.  Alai anggo foto, songon kenang-kenangan (dokumentasi) ndang adong. Songon i ma jolo huroha tingkina. Dung Pdt. T.O Purba manguluhon huria on, sinangkapan ma pembangunan tu pargarejaan on. Pinapinda ma gareja darurat on sian pajak saonari tu inganan on. Darurat do gareja on, laos  tingki i ma dibongkar gareja sian Kampung Toba. Benget do amanta Pdt. T.O. Purba laho mandohoti ulaon i. ai manang piga bulan hami sai manggotong royong do pargarejaon on. Hau ni rambong binangkai do, asa unang mansusai tu pudi. Terlaksana do ulaon i, marudut ma tu semi permanen jala tulus do  mardalan ulaon i ala satahi do sude ruas. Ruas ni huria i tingki  i ima 149 Rumah Tangga. Dung boi bangunan i semi permanen roma surat pinda ni Pdt. T.O. Purba tu Belawan 2. Na mangganti nasida tu huriaon. Pdt. H. Sidabutar. Laos di pargarejaan on do diojakhon Preses  J. Togatorop sian amanta Pdt. P.K. Sinaga tu Pdt. T. O. Purba.
 
Taon 1972 ro ma beslit ni Pdt. Purba. Dung pinda Pdt. T. O. Purba adong ma konflik di huria on, parhalado ( sintua ) tu wakil Guru Huria (St. M. Lubis) . Songon i ma sejarah singkat sian iba songon wakil Guru Huria tingki sahat tu taon 1972.  Tuhanta na masu-masu. Keadaan Ressort Aek Kanopan dung taon 1973 Dung marganti Guru Huria. Dung mangula Pdt. H. Sidabutar di Huriaon. Marudut ma muse ro Guru spesial sian Pusat Gr. H. Sidauruk/ Ditaon 1983 on adong na hurang denggan antara ni hami dohot na angka lan na asing. Ro guru hurianta tu Aek Kanopan on, ala na laho do tu pusat Pearaja Tarutung dongan na bonggal, laho mangido Guru Huria di toliopi Pdt. H. Sidabutar, naso parbinotoanhu. Gabe songoni ma dang denggan serah terima. Tegas ndang olo au. Alai roma Pdt. H. Sidabutar gabe nasida ma langsung gabe songon sada guru huria. Songon i ma serah terima gaung-gaung. Pinda ma Pdt. H. Sidabutar, namangganti Pdt. S. Pasaribu, na mangganti muse i ma Pdt. N. Simanjuntak laos di tingki ni Pdt. Pasaribu ma dibangun gareja setengah permanen.. Pinda ma amanta Pdt. N. Simanjuntak namangganti ima Pdt. S.P.Sitohang. Pinda Pdt. P. Sitohang namangganti ima amanta Pdt. S. Pangaribuan laos di tingki nasida ma  dibangun gareja + jabu Guru Huria +Jabu Bibelvrow + bilut parhobasan. Pensiun amanta Pdt. S. Pangaribuan na mangganti Pdt. A.M . Purba. Amanta Pdt. S. Pangaribuan laos di Aek Kanopan do nasida tinggal. Pinda Pdt. A. M. Purba. Amanta Pdt. B. Malau na mangganti nasida ima Pandita na sinuaeng.
Pandita : tu Resort Aek Kanopan

  1. Pdt. T. O. Purba (+)/ br. Siahaan
  2. Pdt. H. Sidabutar/ br. Naiborhu
  3. Pdt. S. Pangaribuan/ br. Siahaan
  4. Pdt. N. Simanjuntak/ br. Sihombing
  5. Pdt. S.P. Sitohang (+)/ br. Sianturi (+)
  6. Pdt. S. Pangaribuan / br. Nainggolan
  7. Pdt. M.A. Purba (+)/ br. Nainggolan (+)
  8. Pdt. B. Malau (+)/ br.Pandiangan
  9. Pdt.DPS.Silaen (+) /br.Sianturi
  10. Pdt.Tunggul Limbong,STh/br.Tampubolon
  11. Pdt.Anggiat Saut Simanullang,STh/DK.br.Sihombing

Guru Huria – Pendeta Fungsional

  1. Gr.H.Sidauruk/br.Sitorus
  2. Gr.J.Manurung/br.Sirait
  3. Gr.J.B.Lumban Tobing/br.Hutauruk
  4. Gr.H.Sianipar/br.Silaen
  5. Gr.A.B.Silaban/br.Simbolon
  6. Gr.N.Tambun/br..Butarbutar
  7. Gr.M.Manurung/br. Simanjuntak
  8. Gr.A.Nainggolan/br.Sitorus
  9. Gr.Cibro/br…………………….
  10. Gr.T.Hutasoit/br………………
  11. Gr.Siahaan/br.Simangunsong
  12. Pdt.Aknis Siahaan,STh/ L.Simatupang
  13. Pdt.Andi Rustam Syahrial Simangunsong,STh/br.Sitorus

Bibelvrow :

  1. Bvr.Lubis
  2. Bvr.Butar-butar
  3. BVr.Batubara
  4. Bvr. Berutu – Siringoringo
  5. Bvr.Pasaribu
  6. Bvr.Silitonga
  7. Bvr.Marpaung
  8. Bvr.H.Simanungkalit/ Pasaribu
  9. Bvr.Sianturi/Marpaung
  10. Bvr.Relita Simangunsong/A.Gultom